В понедїлёк отваряме Выставу музичного фонду Юрая Цімбору

Дня 19. мая о 15.30 год. буде в рамках Русиньского фестівалу 2014 в просторах Піддукляньского освітнёго центра у Свиднику отворена выстава музичного фонду Юрая Цімбору – книжок, маґнетофоновых пасок, нотовых записів співанок і документїв о ёго приватнїм жывотї. Куратором выставы є Мґр. Ян Калиняк.

Юрай Цімбора, вызначный хормайстер, діріґент, композітор, драматурґ, текстар, фолклоріста і педаґоґ – продовжуватель у роботї свидницькых хормайстрів, учителїв Івана Поливку і Станїслава Яворського, є означуваный і як найвекша персона у русиньскый музичнїй культурі. Народив ся 6. юна 1919 у Свиднику. В 1938 році скінчив педаґоґічный ґрекокатолицькый семінарь у Пряшові і спеціяльны курсы хорового співу і діріґуваня, в 1955 році успішно скінчів студія на братіславськым консерваторію. Пізніше вчив на Ґимназії у Свиднику, Гуменнім, на Педаґоґічнїй школї у Пряшові.

В Піддукляньскым україньскым народнїм ансамблї у Пряшові робил на веце позиціях – як хормайстер, діріґент, умелецький ведучий і драматурґ. За свою культурно-освітню роботу дістав штатну нагороду „За выборну роботу“ і „Заслуженый робітник культуры“, быв оцінєный плакетами і вельо діпломами. Написав і гармонїзовав десяткы співанок і танців про ПУЛЬС у Пряшові і про колективы інтересуючи ся умелецьков роботов. Спеціяльно про Свидницьке свято культуры написав декілько співанок, якы были высыланы і в ческословеньскым розгласі. Його редакції народных співанок были публікованы і в Репертуаровых сборникох, котры выдав Культурный союз україньскых трудящих у Пряшові. Кінцём рока 1989 по довгій хворобі умер. Є похованый на цінтирю у Пряшові.