Термін Русиньского фестівалу в році 2014

Русиньскый фестівал є новый проєкт, якый ся першый раз розпочав кінцём мая 2013 в ареалї свидницького амфітеатра. Лоґом фестівалу є „од Русинів про вшыткых“ а головным одказом фестівалу є толеранція і співпраця меджі народностями не лем на теріторії Словеньска. За фестівалом стоїть думка представіти русиньску культуру на цілоштатнїй і на европскый уровнї.

В прошлых днях зме скінчили біланцію першого річника. Проґрам, якый ся відбывав тыждень, навщівило 8300 позерателїв. В такым перспективным проєктї хочеме продовжуваты – дальшый річник ся відбуде в днёх 19.—25. мая 2014. Зачинаме готуваты головный програм через вікенд і допроводны акції через тыждень. Так як і в річнику 2013 хочеме принесты Вам культуру русиньской меншины в спектрі выставок, бесід, театрального представліня, фільмів, выступліня музыкальных колективів і фольклорных тілес. Фотоґрафія ку чланку: ФС Розмарія на Русиньскым фестівалї 2013 (Автор: Браніслав Шандала)