ПУЛЬС

Професіоналне умелецьке тїлесо. ПУЛЬС выник в роцї 1955 у Пряшові з цїлём пестовати і сценічно презентовати вокално-музичне і танечне фолклорне богатство Русинів. В ёго трёх зложках – танечній, співацькій і музичній дїє веце як 40 умелцїв-професіоналів. Драматурґія ПУЛЬС-у ся замірює в першім рядї на традіції Русинів, компактно заселяючіх северовыходну часть Словакії, але таксамо на фолклор іншых реґіонів Словакії, компонуючі го до высшой сценічной формы. Во своїм репертуарї має ПУЛЬС ай танцї з околитых країн. ПУЛЬС ся так став єдинечным професіоналным тїлесом, што мож збачіти на ёго представлїнях. В них ся вяже жывелность гордого натурелу із тонкым чутём про поетіку. Концерты ПУЛЬС-у суть емотівны, духовно богаты, позератель ся на них може одреаґовати, але таксамо начерьпати множество позітівной енерґії. Почас історії ПУЛЬС-у ся в нїм вычеряло понад 500 професіоналных умелцїв. Многы з них у своїй карьєрї продовжовали в іншых колектівах і тїлесах на Словакії, або за граніцями. Бывшы Пульсаци днесь ведуть аматерьскы драматічны колектівы, або як педаґоґове ся венують выхові молодшой умелецькой ґенерації.
ПУЛЬС од свого взнику абсолвовав веце як 10 000 представлїнь дома і десяткы загранічных заяздів. Плескали му позерателї в Анґлії, Булгарії, Франції, Голандії, в Даньску, бывшій Югославії, Канадї, Норьску, Полщі, Ракуську, Швайчарьску, Італії, в Тунісї, США і в країнах бывшого Совєтьского союзу. Днешнїй ПУЛЬС є амбіціозне тїлесо із смілыма драматурґічныма планами, котры хоче в будучности наповнити. ПУЛЬС діспонує властнов технічнов зложков – професіоналным парком освітлёваня і звуку, а таксамо властным транспортом.