Федор Віцо: Штерадцать років од початку серіялу Ілько Сова з Баюсова

У проґрамі Русиньского фестівалу 2014 буде бесіда с Федором Віцом, у котрій знамый карікатуріста побісідує о свої творчости і жывотї. У ровнакым часі і на тым самым місці, то значить 19. мая у свидницькым Голичстві ся відбуде і вернисаж выставкы ёго карікатур зо серіялу кресленого гумору Ілько Сова з Баюсова.

Федор Віцо ся рахує як єден з найвызначнїшых сучасных русиньскых особности. Десятиріччя ся ёго карікатуры публїкують у новинках з цілословеньсков і краёвов тиражов (Sme, Korzár, Hospodárske noviny, Šport і дальшы). Єден час креслив і про ческы Лідовы новинкы. Зорґанізовав уж 20 рочників меджінародного конкурсу кресленого гумору на тему пиво під назвов Златый судок. Послїднє быв оцінєный цінов Чеськой унії карікатурістїв, котрой є честным членом. В чесько-словеньскым конкурсі Новинарьска ціна, каждорічно выголошеным Надаціёв отвореной сполочности, ся став лауреатом за публікаційну творчість в року 2011. Активно ся анґажує в сполку Русиньска оброда і в Здружіню інтеліґенції Русинїв Словеньска. Быв єдным з протаґонистїв а рівно з тым грав у двох філмох Марка Шкопа – Іншы світы і Осаднє. Є вызначнов і інспіративнов особностёв на Словеньску.

В 1969 році комунистицька страна стягла і зошротувала ёго збірку кресленых анекдот Дереш, котры довтодї были правіделнї публікованы в гуморістичным журналї Рогача, а заказали му публіковати в тзв. центральнїй тлачі.

Аж о пять років пізніше, у році 1974 было Федорові Віцові доволене по новому публіковати в тыжнёвым періодіку втодышнёго Культурного союзу україньскых трудящіх Нове життя. Втодї возникнув Ілько Сова з Баюсова, котрый і напіперек волї втодышнёго політицького веджіня быв першым кресленым Русином з привілегіёв уживати русиньскый язык в офіціяльных контактох. Кресленый серіял быв але по десятёх роках редакціёв заставеный а на дальшых вісем років быв Ілько Сова занімітый. Аж в році 1992 зачав опять выходжати в русиньскых Народных новинках а в року 2004 перешов до новинок інфоРусин. У році 2001 ся дочекав і своёй книжнёй подобы.